Aktuelles

8. Februar 2014 - Leserbrief im Reutlinger General Anzeiger zum Thema Reutlinger Stadthalle

»Emmr hend’r äbbes zom bruddla«

Faschd äll Woch läs i eire Läsrbriaf zom Thema Schdadthalle. Ond emmr hend’r äbbes zom bruddla!

Ersch war’s dr Blaan, no dr Bau, jedz send’s d’Vrooschdaldonga mo drenna schdaddfended.

Vorällem ibr d’Konzärd wird gschombfa. S’hed koin Blumaschmugg, s’sei älles so kahl ond ed fäschdlich, de oine isch d’Muusig z’laud, de andre z’lais ond de nägschde reged sich ihr’s Gschirrgläbbra uff. Mr eschoffierd sich wemma an dr Gardroob waarda hod miaßa, s’Händy hed koin Embfang, d’Schiahl seied oobegwehm, dr Nochbr schdengd noch Gnoblauch ond s’war faschd koin Buddr uff dr Brädzl.

Seid a bar Monad gang i mid maira Mama wiedr en’s Konzärd ond därra ihr sääligs Lächla, wenn se mir zuaflüschdred »schee hend se gschbield, gell«, des machd mi gligglich. Weil des isch nemmlich des morom’s bei ma Konzärd ganga duad!

I han eich an briima Vorschlag, ihr Konzärdbruddler, ond i schwädz jedz bloß vo de Konzärd, älles andre koo i ed beurdoila: Kaufed eich doch a CD vo denne Schdiggla dia mo do gschbield wärred, hogged eich drhoim uff eiren Sofa, no hendr’s kommod, schdelled eich a Briiml uff’s Dischle, zwägs’em Bluumaschmugg, schmiered eich an Badza Buddr uff d’Brädzla ond schengked eich a Vierdele ai, weil drhoim schmegged’s emmer no am beschda, gell.

Noo dennd’r uff d’Färnbedienong drugga ond heered eich dui CD oo, d’Laudschdärge kenned’r so macha wia’s eich baßd, wenn’r huaschda odr uff’s Glo miaßed drugged’r oifach uff d’Pausataschde ond gladscha miaßed’r au ned!

Wenn’s aus isch odr wenn’r gnuag hend odr wenn’s eich ed gfelld, no kenned’r uff’em dirägda Wäg en’s Näschd ganga, do miaßed’r ed amol uff dr Kiddl waarda! Gschiggd, gell!

 

 

17.11.2012 - Leserbrief im Reutlinger General Anzeiger

Autofahren auf der Alb

»Verkehrsrächsdsfreie Zone«

Also, i fahr jo scho lang Audo, gell, abr i muaß saga, en ledschdr Zeit isch des do oba uff dr Alb ächd grauslich worra. Des isch scheinds a verkehrsrächdsfreie Zone worra, i han do zwar nix gheerd odr gläsa driibr, abr des ko ed andersch sei.

Do wimmeleds bloß so vo Raser, Drengler, Neidrugger ond Nausziagr. I woiß gar ned, mo dia älle so nobrässiered, dui Allmachtsdaggl!

I vrmud mol, ens Grab. Dia welled vielleichd au so a schees glois Greidzle han, dia mo do ibrall am Schdroßarand schdandet. Ond uff älle Fäll welled se gern no äbbr andersch midnemma, am liabschda glei a baar uff oimol.

Des liesd mr jo au jeden Dag em Generaler: Zu schnelles Fahren, missglücktes Überholmanöver, an unübersichtlicher Stelle aufgefahren, von der Straße abgedrängt, plötzliches Einbiegen, nicht angepasste Geschwindigkeit, ond so weidr. Mensch Leud, mir send do uff dr Landschdroß ond et uff'rn Hoggahoimreng!

Ond dia Verkehrsschildr, dia kehd mr eigendlich au glei wegmacha, weil fir dia endressierd sich eh koi Sau.

Ha, neilich wiedr! Do schdohd siebzich, ond i fahr siebzich, ond i säh scho em Rüggschbiegl so an Dieffliagr uff me druffhalda, dass mr's hemmelangschd werra duad. Den han i no an dr Schdoß- schdang bäbba, wia wenn mr do an Magneda dranna hed. I säh, wia där wia wild am geschdiguliera isch, ond i befürchd, där isch kurz vorem Herzkaschbr. Ond i ibrleg mr scho, ob i ned schneller fahra soll, vielleichd isch jo mei Tacho hee, ond i fahr bloß vierzich. No fahr i hald amol achzich, sagd wenigschdens mei Tacho, abr des nüdzt au nix.

Mensch Leud, was denged ihr do eigendlich dabei? Soll i mi jedz uffleesa odr zu Schdaub zerfalla, odr was? Des isch doch eigendlich zemlich bleed, was ihr do dennd, odr ned? Außrdem zahl i fei au Schdeira ond derf do fahra!

Ab ond zua ondrbrichd ibrraschendr Weise amol a Dörfle dui Landschdroß. Ond no beschwärd mr sich, dass d'Bolizei an de Ortsaigäng vo dene Dörfla Blidzer uffschdelld. Ha, ihr send doch ed rächd bacha Leud! Mensch, fahred doch do oifach fuffzich, no blidzed's au net! Schlau, gell?

Ond no dia Ibrholschbedzjalischda! Dia hend au älle zviel Alarm für Kobra 11 ogugged. Nochdem sich dr Vordrmoo äba ed en Luft aufleesa ko, ibrholed se hald, egal ob se äbbes sähed odr au ned, odr ob do äbber endgega komma duat odr ed. Ond wia zom Bossa ibrholt uff dr Gegafahrbahn au glei oiner! Mr koo sich jo ed lomba lassa, gell! Ond no isch's wia em Kendrgarda, wär z'ersch zuggd hod vrlora.

Meischdens miassed dia mo ibrhold werred au no bremsa, sodass dia Kamikaze no kurz vorem Kräsch neidrugga kenned! Mensch Leud, des isch ed kuuhl odr geil, wär hod eich do bloß en's Hirn neigschissa? Ond s'beschde isch jo, daß dia Sembl an dr nägschda Greidzong wiedr vor oim schdanded. Ha des hod sich glohned, gell ihr Käbbsala!

Neilich han i gläsa, dass an oim Wochaend achd Modorradfahrer om s'Läaba komma send. Ha, des wondred mi ed. Dia send jo faschd no schlemmr wia dui Audoraser, abr se falled jo zom Glig meischdens bloß samschdichs ond sonndichs do oba ei. Wia d'Mugga richdong Scheißhaufa, so werred dia vo dr Alb ozoga, abr ed, weil's bei ons so schee isch. Dia kommed bloß zom Rasa, ed zom Gugga!

Ond no brauchd mr au ned noch sicherere Schdroßa ond endscherfde Kurva schreia. Ha, so a Schnabsidee! Dui Schdroß isch ed schuld, wenn dia sich zerleged! No geids hald a baar Greidzla meh am Schdroßarand, dia halded dr Reschd abr au ned vom rasa ab.

Ond heila brauchd mr no au ned, wenn wiedrmol oiner middem Audo odr middem Modorrad an Abflug gmached hod. Dia send doch sälbr schuld, dia hirnlose Bagasch!

Also isch doch an heenigr Raser doch oifach oiner wenigr, där wo mi ond de andre Normalfahrer en d'Bredullje brenga duad!

Bloß om dia, wo do oschuldig mid neizoga werred, om dia isch's schad. Mensch Leud, kenned ond welled ihr eich eigendlich vorschdella, wia des fir Eldra isch, wenn se ihr Kend beerdiga miassed? Odr andersch rom, welled ihr eire Kendr ed uffwachsa säha?

I hed do no an gandz brima Vorschlag fir d'Bolizei: Fahred doch oifach amol ab ond zua a Schdündle do oba uff dr Alb rom, ond zwar em Zivilaudo! Ond no fanged'r älle dia Raser ond Drenglr dia mo sichr ed bloß mir so uff dr Zeigr ganged! Des lohnd sich, sag i eich! Ihr kenned au gern mei glois Audole han, ond i fahr no solang mid eirem Schdroifawaga rom ond nom, ond frai mi wia an Schnaikeenig, dass i endlich amol koin hendadruff henga han ond älles om mi rom schee zivilisierd ond endschbannd isch!

Susanne Zimmerer, St. Johann-Bleichstetten